Азид хамтын ажиллагаа, итгэлцлийг бэхжүүлэх бага хурал

Conference on interaction and confidence building measures in Asia ( CICA)-н  Гүйцэтгэх захирал, элчин сайд Кайрат Сарыбай Монгол улсын засгийн газрын урилгаар манай улсад айлчилж, энэ сарын 10-ны өдөр ГХЯ болон бусад яам, судалгааны хүрээлэнгийн ажилтнууд, эрдэмтэн судлаачдад зориулан тус байгууллагын үйл ажиллагааны тухай дэлгэрэнгүй мэдээлэл хийлээ.  

Элчин сайд Кайрат Сарыбай намайг БНКазахстан Улсад элчин сайдаар ажиллаж байхад Гадаад хэргийн дэд сайдаар ажиллаж байсан тул бид олон удаа уулзаж хамтран ажиллаж байсан билээ. 

Миний бие БНКазахстан Улсад элчин сайдаар ажиллаж байхдаа Азийн хамтын ажиллагаа, итгэлцлийг бэхжүүлэх бага хурлын 20 жилийн ойн ёслолын арга хэмжээнд оролцож байсан юм. Энэ тухай дурсахад:

Азид хамтын ажиллагаа, итгэлцлийг бэхжүүлэх бага хурлын Алматы хотноо байрлах Нарийн бичгийн дарга нарын газартай байнгын холбоотой ажиллаж, тус байгууллагыг зохих мэдээллээр хангаж, тус байгууллагаас зохион байгуулж байсан бүхий л арга хэмжээнд идэвхтэй оролцож байлаа. Энэхүү байгууллагыг Казахстаны Ерөнхийлөгч Н.Назарбаевын санаачилгаар байгуулсан бөгөөд Казахстаны зүгээс маш их анхаарал тавьж, хөрөнгө санхүүгийн хувьд дэмжлэг үзүүлж ирснээр одоо бүс нутгийн яриа хэлэлцээний нэг чухал механизм болоод байгаа юм.

Казахстан улсын нийслэл Астана хотод 2012 оны 9 дүгээр сарын 9-10-нд  болсон АХАИБЗ (Азид хамтран ажиллах, итгэлцлийг бэхжүүлэх зөвлөлгөөн)-ий Ахлах албан тушаалтны хорооны хуралд миний бие Монгол Улсыг төлөөлөн оролцож, АХАИБЗ-ий Гадаад хэргийн сайд нарын 4 дүгээр уулзалтаас гаргах  тунхаглалын баримт бичигт манай улсын байр суурийг тодорхой тусгуулж чадсан билээ. Тус зөвлөлгөөний 2012 оны 9 дүгээр сарын 12-ны өдөр болсон уулзалтын онцлог нь АХАИБЗ-ний 20 жилийн ойг тэмдэглэсэн явдал байлаа. Сайд нарын уулзалтын нээлтийн ажиллагаанд БНКазУ-ын Ерөнхийлөгч Н.А.Назарбаев оролцож тус байгууллагын 20 жилийн хугацаанд гүйцэтгэсэн үүрэг, үйл ажиллагаа, цаашдын зорилтын талаар дэлгэрэнгүй үг хэлсэн юм.

“Азид хамтран ажиллах, итгэлцлийг бэхжүүлэх бага хурлын Нарийн бичгийн дарга нарын газар, түүний ажилтан, гишүүн улсуудын төлөөлөгчдийн эрх ямба, дархан эрхийн тухай конвенц”-д Монгол Улсын Засгийн газрыг төлөөлөн элчин сайд миний бие гарын үсэг зурж, “АХАИББХ-ын Нарийн бичгийн дарга нарын газрын Дүрэм”-д Монгол Улс нэгдэн орсон тухай баримт бичгийг казахстаны талд гардуулж байлаа.

Монгол Улс Төв Азийн орны хувьд энэ бүс нутгийн яриа хэлэлцээ, хамтын ажиллагаанд идэвхтэй оролцох шаардлагатай гэж би үздэг. Иймээс 2010 онд Алматы хотод зохион байгуулагдсан ТрансАзийн парламентын “Евроазийское  измерение ОБСЕ” форум, Азийн хамтын ажиллагаа, итгэлцлийг бэхжүүлэх бага хурлын Гадаад хэргийн сайд нарын уулзалт зэрэг олон улсын томоохон хурал, зөвлөлгөөнд Монгол Улсыг төлөөлж оролцож байсан билээ.