Украиныг тус сангийн хүрээнд дэмжих урьдчилсан нөхцөл нь Украин улс олон намын парламентын тогтолцоо, хууль дээдлэх ёс зэрэг үр дүнтэй ардчилсан механизмыг дэмжиж хүндэтгэх, хүний ​​эрх, тэр дундаа тус улсын цөөнхи үндэстний эрхийг хүндэтгэх баталгаатай байх ёстой гэсэн нөхцөл тавьжээ.

Киев 33 тэрбум еврог зээл хэлбэрээр, 17 тэрбум еврог буцалтгүй тусламж хэлбэрээр авна. Сангийн хуваарилалтыг Европын комиссоос ирүүлсэн саналын дагуу Европын зөвлөл хариуцна. Санхүүгийн хэрэгжилтийн талаарх ЕХ-ны жилийн тайланд үндэслэн Европын зөвлөл жил бүр санхүүжилтийн асуудлыг хэлэлцэж, шаардлагатай бол төлөвлөгөөнд өөрчлөлт оруулахаар тохирсон байна.

Ардчиллын зарчим, цөөнхийн эрхийг хүндэтгэх асуудал нь Украиныг тус холбоонд элсүүлэхийн тулд ЕХ-ноос тавьсан болзолд мөн багтсан байдаг. Өнгөрсөн оны сүүлчээр Европын Холбооны Зөвлөл ЕХ-ны зөвлөмжийн дагуу Киевтэй энэ асуудлаар хэлэлцээ хийж эхлэхийг зөвшөөрсөн. Украин авлигын эсрэг тэмцлээ чангатгах, Европын стандартад нийцсэн хууль батлах, үндэсний цөөнхийн эрхийн баталгааг чангатгах зэрэг шаардлагуудыг биелүүлсний дараа хэлэлцээ албан ёсоор эхлэх ёстой юм.

Өнгөрсөн оны сүүлээс хойш яригдсан энэхүү 50 тэрбум еврогийн санхүүжилтийн асуудалд Унгар улс хориг тавиад байсан. Энэ удаагийн уулзалтын өмнө ЕХ-ны удирдлагууд Унгар улс дахин хориг тавих байх гэж ихээхэн айн болгоомжилж, хэрэв дахин хориг тавибал Унгар улсын санал өгөх эрхийг түдгэлзүүлэх, эдийн засагт нь хориг тавих гэх мэт арга хэмжээ авах тухай хэвлэл мэдээллээр ярьж бичиж ирсэн бөгөөд Италийн ерөнхий сайд, Францын ерөнхийлөгч гэх мэт хүмүүс  Унгарын Ерөнхий сайд Орбантай удаа дараа уулзаж яриа хэлэлцээ хийжээ.  Үүний үр дүнд Унгар улс энэ удаа хориг тавьсангүй, гэхдээ зарим нөхцөл болзол тавьсаныг ЕХ хүлээж авсан байна. “Guardian” сонинд мэдээлснээр Брюссель Будапештийн хоёр нөхцөлийг зөвшөөрчээ, Тухайлбал, хоёр жилийн дараа Европын Комисс Украины санхүүжилтийн зарцуулалтад үнэлгээ хийж, дараа нь улс орнууд дэмжлэгийг үргэлжлүүлэх эсэх талаар санал хураалт явуулах, Европын холбооноос Унгарт өгөх ёстой царцаасан мөнгийг (30 сая евро) Украинд туслахад ашиглахгүй байхаар тохиролцжээ. 

Герман, Франц, Бельги зэрэг олон оронд фермерүүд жагсаал цуглаан хийж, цалин хөлсөө нэмэгдүүлэх, хөдөө аж ахуйд үзүүлэх хөнгөлөлт тусламжаа нэмэгдүүлэх, Украинаас орж ирж байгаа Европын холбооны стандартад нийцэхгүй, хямд үнэтэй бараанд хориг тавих, ЕХ-ноос явуулж байгаа хөдөө аж ахуйн бодлогыг эсэргүүцэж байгаа ч гэсэн ЕХ-ны удирдлагууд Украинд үзүүлэх санхүүжилтийн асуудлыг ийнхүү шийдвэрлэлээ. Ерөнхий сайд Виктор Орбан уулзалтийн өмнө Бельгийн жагсаалд оролцож байгаа фермерүүдтэй уулзахдаа ЕХ-ны удирдлагад өөрчлөлт хийхгүйгээр байдал сайжрахгүй гэдгийг онцлон хэлсэн нь анхаарал татаж байна. Ер нь ЕХ-ноос ОХУ-д тавьсан 12 удаагийн хориг арга хэмжээ нь Оросын эдийн засагт биш харин Европын орнуудын эдийн засагт хүнд цохилт болж байгааг судлаачид байнга сануулж бичиж байна. Гэтэл ЕХ дахин 13 дахь удаагийн хориг арга хэмжээ авах тухай ярьж эхлээд байна. Энэ нь ЕХ-ны удирдлагууд өөрийн орны ард түмний амьдралыг үл тоомсорлож, бодит байдлаас хэт тасарсанг харуулж байна.