2024 онд Хятад, Оросын харилцаа, хоёр орны ажил хэргийн хамтын ажиллагаанаас ямар хүлээлттэй байна вэ?

БНХАУ-ын дарга Ши Жиньпин, ОХУ-ын Ерөнхийлөгч Владимир Путин нарын стратегийн удирдлага дор Хятад, Оросын иж бүрэн түншлэлийн харилцаа, стратегийн хамтын ажиллагаа шинэ эринд орж, түүхэн дэх хамгийн сайхан үеийг туулж байна. Даваа гарагт Ши Жиньпин дарга ОХУ-ын ерөнхийлөгчөөр улиран сонгогдсонд нь Ерөнхийлөгч Путинд баяр хүргэсэн нь хоёр орны удирдагчдын бат бөх найрамдал, улс төрийн харилцан итгэлцлийн илэрхийлэл юм. Тал бүрийн язгуур ашиг сонирхлыг хөндсөн асуудлаар бие биенээ тууштай дэмжсэн, харилцан уялдаатай стратегийн харилцаа улам бүр ойртож байна.

Хоёр талын худалдааны эргэлт 240 тэрбум ам.долларыг амжилттай давлаа. “Хятадад үйлдвэрлэв” гэсэн тэмдэг нь Оросын хэрэглэгчдийн дунд улам бүр түгээмэл болж, итгэл үнэмшилтэй болж байна. ОХУ-ын хөдөө аж ахуйн бүтээгдэхүүн, далайн хоол зэрэг нь Хятадад маш их эрэлт хэрэгцээтэй байдаг.

Хоёр улсын хүмүүнлэгийн хамтын ажиллагаа улам өргөжиж, боловсрол, соёл урлаг, аялал жуулчлал, эрүүл мэнд зэрэг салбарын хамтын ажиллагаа амжилттай хөгжиж байна.

Хятад Оросын олон талт хамтын ажиллагаа эрчимтэй хөгжиж, хоёр орны харилцааны хөгжилд бат бөх суурь тавигдлаа.

2024 онд Хятад, Орос хоёр орон дипломат харилцаа тогтоосны 75 жилийн ой, хоёр орны соёлын жилийг харилцан тэмдэглэнэ. 75 жил хөгжиж ирсэн Хятад Оросын харилцаа улам боловсронгуй болж байна. Хоёр орны гар нийлэн ажиллах эрмэлзэл улам бүр бэхжиж байна. Үеийн үед уламжлагдан ирсэн найрамдлын үндэс суурь батжиж, иж бүрэн хамтын ажиллагааны хэтийн төлөв улам өргөн болж байна. Одоогийн байдлаар талууд дипломат харилцаа тогтоосны 75 жилийн ойг ёслол төгөлдөр тэмдэглэх тохиролцоонд хүрч, Хятад, Оросын соёлын жилүүдийн хүрээнд гэрэл гэгээтэй, олон нийтийг хамарсан, сэтгэлд дулаахан олон арга хэмжээ зохион байгуулахаар төлөвлөж байна.

БНХАУ-ын дарга Ши Жиньпин, ОХУ-ын Ерөнхийлөгч Владимир Путин нар нягт харилцаатай байж, хоёр орны дээд түвшний солилцоо эрчимтэй хөгжих болно. Эдийн засаг, худалдаа, эрчим хүч, зам тээвэр, хөдөө аж ахуй зэрэг салбар дахь хамтын ажиллагаа тасралтгүй хөгжиж, дижитал технологи, хиймэл оюун ухаан, ногоон эдийн засаг зэрэг өндөр технологийн салбарт хоёр талын хамтын ажиллагааны боломж цаашид ч улам нээгдэх болно.

Хариуцлагатай том гүрнүүд болохын хувьд Хятад, Орос хоёр улс эрх тэгш, эмх цэгцтэй олон туйлт ертөнц, аль ч талд ашигтай эдийн засгийн даяаршлыг байгуулах эрин үеийн эрхэм зорилгыг хэрэгжүүлж, хүн төрөлхтний нийтлэг хувь заяатай нийгэмлэгийг хамтаар байгуулах болно. БРИКС-ийг энэ онд даргалаж байгаа ОХУ-ын үйл ажиллагааг бид бүх талаар дэмжиж, БРИКС-ийн орнуудтай хамтран Глобальный Юг (Ерөнхийдөө АНУ, Өрнөдийн хөгжингүй орнуудаас бусад орныг хамруулсан улс төрийн шинэ нэр томъёо)-г нэгтгэн хөгжүүлэх шинэ хуудсыг нээх хүчин чармайлт гаргахад бэлэн байна.