Украины Биологийн лабораторийн асуудал сүүлийн үед дэлхийн олон нийтийн анхааралыг татаж байна. Энэ асуудлаар НҮБ-ын Аюулгүй Зөвлөлийн яаралтай хуралдааныг зохион байгуулсан юм. Энэ талаар гадаадын хэвлэлд нийтлэгдсэн зарим мэдээлэлийг толилуулья.
Дэлхийн эрүүл мэндийн байгууллага
"Ройтерс" агентлагийн мэдээлснээр, Дэлхийн эрүүл мэндийн байгууллагаас (ДЭМБ) Украины Биологийн лабораторид байгаа аюултай эмгэг төрүүлэгчдийг (опасные патогены) устгахыг Украинд зөвлөжээ. Украинд байрладаг АНУ-ын лабораториос аюултай эмгэг төрүүлэгчдийг тараах эрсдэлээс урьдчилан сэргийлэхийн тулд юу хийх хэрэгтэй вэ гэсэн асуултын хариуд Дэлхийн эрүүл мэндийн байгууллагын хэвлэлийн төлөөлөгч тус байгууллага "лабораториудад био аюулгүй байдлыг хангах, өөрөөр хэлбэл эмгэг төрүүлэгчийг санамсаргүй эсвэл санаатайгаар гаргахаас урьдчилан сэргийлэх ажлыг дэмжинэ" гэж онцлон тэмдэглэжээ. " "Энэ ажлын хүрээнд ДЭМБ-аас Украины Эрүүл мэндийн яам болон бусад холбогдох байгууллагуудад ямар нэгэн эндэгдэл гарахаас урьдчилан сэргийлэхийн тулд маш аюултай эмгэг төрүүлэгчдийг устгахыг хатуу зөвлөж байна" гэж хэвлэлийн алба бас онцлон тэмдэглэсэн байна.
ОХУ-ын байр суурь
Украинд байгаа үхлийн аюултай эмгэг төрүүлэгчдийн судалгааны био лабораторийг Пентагон санхүүжүүлдэг байсныг нотлох баримтуудыг Оросын арми илрүүлсэн, Украины нутаг дэвсгэрт 30 гаруй биологийн лабораторийн сүлжээ үйл ажиллагаа явуулж байгаа нь илэрсэн гэж Оросын тал мэдээлэв. Тэнд ажиллаж байгаа эрдэмтэд АНУ-ын Батлан хамгаалах яамны дэргэдэх Эрсдэлийг бууруулах агентлагийн захиалгаар ажиллаж байсан гэж мэдэгджээ.
Украины биологийн лабораторид хийсэн нүүдлийн шувуудаас халдвар дамжих Америкийн төслийн санхүүжилтийн хэмжээ 1.6 сая доллар, сарьсан багваахайгаар дамжин тархсан эмгэг төрүүлэгчийн спектрийг судлах төсөл 1.3 сая доллар байжээ.
ОХУ-ын Зэвсэгт хүчний цацраг, хими, биологийн хамгаалалтын албаны дарга Игорь Кирилловын хэлснээр эхний төсөл нь 2018-2020 онд хэрэгжсэн, хоёр дахь төсөл нь 2020-2023 он хүртэл хэрэгжиж байгаа аж.
ОХУ-ын ГХЯ-ны сайд Сергей Лавров Украины гадаад хэргийн сайдтай Туркт хэлэлцээ хийснийхээ дараа хэвлэлийн бага хурал дээр энэ нь биологийн болон хорт зэвсгийг хориглох тухай холбогдох конвенцийг зөрчсөн гэж ОХУ үзээд тайлбар өгөхийг шаардсан албан ёсны хүсэлтээ илгээсэн гэж мэдэгджээ.
АНУ-ын байр суурь
Украинд Америкийн биологийн зэвсгийн лаборатори байхгүй гэж Пентагон онцлон тэмдэглэж байсан. АНУ Украйны нутаг дэвсгэрт байгаа био лабораторийн ажилд оролцож байсан бөгөөд энэхүү оролцоо нь "аюулгүй байдлын тусламж үзүүлэх хүрээнээс хэтрээгүй" гэж АНУ-ын Төрийн департамент мэдэгдсэн байна.
Харин АНУ-ын Төрийн нарийн бичгийн даргын Улс төрийн асуудал эрхэлсэн орлогч Виктория Нуланд 3 дугаар сарын 8-ны өдөр парламентын гишүүдийн асуултад хариулах үедээ “Украинд АНУ-ын биологийн судалгааны байгууламжууд байдаг бөгөөд тэднийг Оросын арми хяналтандаа авах бий гэдгээс бид маш их санаа зовж байна. Тиймээс бид эдгээр судалгааны материал Оросын зэвсэгт хүчний гарт орохоос сэргийлэхийн тулд Украинчуудтай хамтран ажиллаж байна” гэжээ. АНУ-ын Үндэсний тагнуулын газрын захирал Аврил Хейнсын хэлснээр, тус улсад ийм 12 орчим байгууламж байгаа гэжээ.
Үүнтэй холбогдуулан АНУ-ийн Бүгд найрамдах намын төлөөлөгчид болон хэд хэдэн хэвлэл мэдээллийн хэрэгслээр Цагаан ордныхныг шүүмжилсэн мэдээ нийтлэгджээ. Тухайлбал, Fox News сувгийн хөтлөгч Такер Карлсон хэлэхдээ, АНУ "Оросыг худлаа мэдээлэл тараасан гээд байсан", гэтэл Виктория Нуландын мэдэгдэл түүнийг үнэн зөв гэдгийг баталж байна гэжээ.
Украины байр суурь
Украины Ерөнхийлөгч Владимир Зеленский Украинд химийн болон бусад үй олноор хөнөөх зэвсэг бүтээгээгүй гэж мэдэгджээ.
Хятадын байр суурь
Украинд байгаа цэргийн биологийн лаборатори болон тэнд хийж байсан вирусын судалгааны талаарх мэдээллийг нэн даруй ил болгохыг Хятадын засгийн газар АНУ-д уриалж байна гэж Хятадын ГХЯ-ны хэвлэлийн төлөөлөгч Жао Лицянь 3 дугаар сарын 8-ны өдөр мэдээлэл хийх үеэрээ мэдэгджээ.
Тахал, боом, туляреми, холер болон бусад үхлийн аюултай өвчний үүсгэгч бодис агуулагдах магадлалтай Украины биологийн лабораторийн аюулгүй байдлыг хангахыг БНХАУ-ын төлөөлөгч мөн уриалжээ.
"Америкийн талаас нийтэлсэн мэдээллээс үзэхэд АНУ Украинд 26 биологийн лаборатори болон бусад байгууламжуудыг АНУ-ын армийн бүрэн хяналтад байлгадаг, АНУ лабораторийн талаар хамгийн их мэдээлэлтэй тал болохын хувьд тэнд байсан вирус, тэдгээрийн судалгааны шинж чанарыг багтаасан холбогдох мэдээллийг аль болох хурдан ил болох ёстой" гэж тэрээр мөн нэмж хэлжээ.