Хятадын баруун хойд хэсэгт орших Янхайн булшны газраас археологичид энэ нутагт огт урьд өмнө олдож байгаагүй олон арьсан хайрсаар хийсэн хуяг олжээ. Янхайн булш нь Хятадын Шиньжянь Уйгарын Турфан хотоос өмнө зүгт 43 кмт оршдог бөгөөд түүхийн олон чухал олдвор олдоод байгаа юм.
Эрдэмтэд энэхүү олдворыг МЭӨ 786-543 оных болохыг тогтоожээ.
Хуяг нь 30 орчим настайдаа нас барсан хүний булшнаас олдсон байна. Судалгааны үр дүнг Quaternary International сэтгүүлд нийтэлсэн байна.
Хуяг нь 5000 гаруй гурван төрлийн (бага зэрэг өөр хэлбэртэй) арьсан хайрсаас бүрдсэн бөгөөд хооронд нь сураар холбож бэхэлсэн байна. Богинохон хантааз хэлбэртэй бөгөөд их биеийн урд хэсэг, гуя, зүүн тал, нурууны доод хэсгийг голчлон хамгаалсан байжээ. Хөл нь огт хамгаалалтгүй, биеийн зүүн талыг голлон хамгаалсан нь баруун гарыг чөлөөтэй байлгах зорилготой ажээ. Хувцасны ар тал нь морь унахад зохимжгүй байснаас үзвэл эзэн нь дайны үеийн морин тэргийг жолоодож байсан байх гэсэн таавар байна.
Энэхүү хаягийн өвөрмөц онцлог нь өөр хүний тусламжгүйгээр бие даан өмсөж болох ажээ. Дундад зууны үеийн Европын дайчдын байлдааны хуяг дуулга нь бусад хүний тусламжгүйгээр өмсөх боломжгүй байсан байна.
Эрдэмтэд уг хуяг хэнийх болохыг тогтоохоор ажиллаж байгаа юм байна. Энэхүү олдвор нь МЭӨ нэгдүгээр зууны үед Евразийн нутагт байсан цэргийн технологийг харуулсан нэн ховор баримтуудын нэг болжээ